Eins og fram hefur komið ákvað mennta- og menningarmálaráðherra að veita nemendum í 9. bekk tækifæri til að þreyta að nýju könnunarpróf í ensku og íslensku. Til þess að útfæra framkvæmdina fundaði Menntamálastofnun með fulltrúum frá Skólastjórafélagi Íslands, Félagi grunnskólakennara Sambandi íslenskra sveitarfélaga, Grunni – félagi fræðslustjóra, mennta- og menningarmálaráðuneyti, sérfræðingahópi um framkvæmd samræmdra könnunarprófa, Heimili og skóla og Umboðsmanni barna. 

 

Á fundinum lögðu allir aðilar áherslu á sveigjanleika í tímasetningum og að skólar hafi val um hvort þeir leggi prófin fyrir í vor eða haust. Niðurstaða fundarins var sú að leggja til að fyrirlögn prófanna fari fram á tveggja vikna tímabili í vor og viku tímabili næsta haust. 

 

Í samræmi við niðurstöðu fundarins gerði Menntamálastofnun tillögu til mennta- og menningarmálaráðuneytis og hefur ráðuneytið ákveðið eftirfarandi prófatímabil: 

 

 

Menntamálastofnun mun innan tíðar senda skólum nánari upplýsingar um skráningar skóla á prófadaga. Prófin í íslensku og ensku verða haldin á tilteknum dögum sem skólar geta valið á milli. Þá munu skólar einnig hafa val um á hvaða tíma dags prófin verða lögð fyrir. Velja þarf sama prófatímabil, vor eða haust, fyrir bæði prófin.

Tekið skal fram að vegna þessa fyrirkomulags á fyrirlögn prófa í íslensku og ensku verður að gera fyrirvara um samræmingu og samanburðargildi þeirra. Lögð verður áhersla á að veita endurgjöf til nemenda með hæfnieinkunn en ekki teknar saman heildarniðurstöður eða meðaltöl.

Ráðuneytið hefur birt meðfylgjandi breytingar á reglugerð nr. 73/2017 er varðar heimildir skólastjóra til að veita nemendum undanþágu frá því að þreyta samræmd könnunarpróf og úrvinnslu prófanna. Ennfremur hefur ráðuneytið kynnt væntanlegar breytingar á reglugerð nr. 1150/2008  þar sem heimild til að taka mið af niðurstöðum samræmdra könnunarprófa við innritun nemenda í framhaldsskóla er felld á brott.

Vinnuhópur mennta- og menningarmálaráðherra um samræmd könnunarpróf verður skipaður á næstu dögum og mun hann gera tillögu að framtíðarstefnu um fyrirkomulag prófanna. Gert er ráð fyrir að hópurinn skili niðurstöðum sínum til ráðherra fyrir árslok.