Mennta- og menningarmálaráðuneyti hefur gefið út eftirfarandi tilkynningu um samræmd könnunarpróf.

Menntamálastofnun vinnur nú að úrvinnslu niðurstaðna nemenda sem þreyttu próf í síðustu viku. Stofnunin mun leita eftir samráði við hagaðila um hvernig staðið verði að nýrri fyrirlögn könnunarprófa í íslensku og ensku. Í framhaldinu verður tilkynnt hvenær ný próf verða lögð fyrir.

Fréttatilkynning

Reykjavík, 14. mars 2018:

NEMENDUR FÁI VAL UM ENDURTÖKU KÖNNUNARPRÓFA

• Stjórnvöldum skylt að bjóða nemendum mat á námsstöðu
• Niðurstöður ekki notaðar við mat á umsóknum um framhaldsskólavist
• Vinnuhópur geri tillögu að framtíðarstefnu um samræmd könnunarpróf

Nemendum í 9. bekk gefst kostur á að þreyta að nýju könnunarpróf í ensku og íslensku, en margir þeirra tóku próf við óviðunandi aðstæður í liðinni viku. Þátttaka í könnunarprófunum verður valkvæð, samkvæmt ákvörðun Lilju Alfreðsdóttur, mennta- og menningarmálaráðherra. Stjórnendur í hverjum skóla ákveða hvort þeir leggja prófin fyrir nemendur sína í vor eða haust.

Þeir nemendur sem luku prófunum í liðinni viku fá afhentar niðurstöður úr þeim. Öllum býðst svo að þreyta sambærileg könnunarpróf að nýju, enda er það lögbundin skylda menntamálayfirvalda að bjóða nemendum mat á námsstöðu sinni. Þeir nemendur sem kjósa, að höfðu samráði við forráðamenn, að taka ekki umrædd próf aftur verða leystir undan prófskyldu. Þessi leið var valin þar sem hún er talin sanngjörnust fyrir nemendur.

Grunnskólalög heimila undanþágu frá prófskyldu samræmdra prófa, ef gildar ástæður eru til staðar. Þær eru tilgreindar í reglugerð, sem nauðsynlegt er að breyta svo þær aðstæður sem nú eru uppi teljist gildar. Vinna við reglugerðarbreytinguna er þegar hafin.

Ákvörðun ráðherra felur í sér að nemendum er tryggð endurgjöf um hæfni sína á tilteknum sviðum. Rétt er þó að hafa í huga að námsmat skóla gefur einnig góða mynd af námsstöðu nemenda. Ekki verða gefnar út svokallaðar raðeinkunnir, ekki verða reiknuð meðaltöl fyrir einstaka skóla eða landssvæði og samanburður milli skóla verður ekki mögulegur vegna annmarka á framkvæmd prófanna.

Á fundi sem ráðherra hélt í morgun með lykilaðilum úr skólasamfélaginu komu fram ólík sjónarmið. Skoðun sumra var að ógilda ætti prófin þetta árið og ekki afhenda nemendum niðurstöður þeirra. Þrátt fyrir ólík sjónarmið sammæltust fundarmenn um að vinna að farsælli lausn í kjölfar ákvörðunar ráðherra. Fundarmenn voru einnig sammála um að gera nauðsynlegar breytingar á reglugerð, svo niðurstöður úr samræmdum könnunarprófum verði ekki notaðar við mat á umsóknum nemenda um framhaldsskólavist að loknu grunnskólanámi. Niðurstöðunum er því ætlað að gefa nemendum sjálfum vísbendingu um eigin námsstöðu, svo þeir geti nýtt sem best síðasta ár sitt í grunnskóla til að auka hæfni sína í tilteknum greinum.

Lilja Alfreðsdóttir, mennta- og menningarmálaráðherra:

„Það var mikilvægt að eyða óvissu um framhald þessa máls. Skoðanir nemenda, foreldra, kennara og skólastjórnenda eru ólíkar og ég hef t.a.m. fengið fjölmörg bréf frá fólki sem ýmist vill fella prófin niður, leggja þau fyrir alla nemendur að nýju eða fara bil beggja. Það er ljóst að engin ein niðurstaða sættir öll sjónarmið í málinu en það er mikilvægt að ákvörðun ráðuneytisins sé í fullu samræmi við lög og sanngjörn gagnvart nemendum. Réttur nemenda verður ekki tekinn af þeim og ég er vongóð um að sátt geti skapast um þessa leið."

Á samráðsfundi í ráðuneytinu með fulltrúum frá nemendum, Skólastjórafélagi Íslands, Félagi grunnskólakennara, Sambandi íslenskra sveitarfélaga, félagi fræðslustjóra, samtökunum Heimili og skóla, umboðsmanni barna, Menntamálastofnun og sérfræðingahópi um framkvæmd samræmdra könnunarprófa var ákveðið að setja á laggirnar vinnuhóp hagsmunaaðila, sem geri tillögu að framtíðarstefnu um fyrirkomulag samræmdra könnunarprófa. Hópurinn verður skipaður á næstu vikum og á hann að skila mati sínu ásamt tillögu til ráðherra fyrir árslok.