Nýlega hélt Menntamálastofnun samráðsfund með fulltrúum ungmennaráða. Tilgangur fundarins var að fá skoðanir ungmenna á ýmsum málefnum og verkefnum stofnunarinnar. Fulltrúar á fundinum voru frá eftirtöldum ungmennaráðum: Barnaheillum, SAFT, Samfés, Unicef, umboðsmanni barna, UMFÍ og fulltrúum úr ungmennaráðum sveitarfélaga; Árborg, Akureyri, Fjarðabyggð og Stykkishólmi.
Ungmennin ræddu um ýmis málefni sem eru ofarlega á baugi í menntamálum. Má þar nefna breyttan einkunnakvarða við lok grunnskóla, rafræn samræmd könnunarpróf, þjóðarsáttmála um læsi og rafræna námsefnisgerð. Einnig var rætt um styttingu framhaldsskólans og kennslu í lífsleikni og sundi í grunnskóla. Unnið var með umræðuefnin í vinnustofum og í lokin kynntu unglingarnir niðurstöður. Fóru fjörugar umræður fram í kjölfarið, en meginniðurstöður fundarins voru:
- Óskað var eftir því að samráð verði haft í framtíðinni við ungmenni þegar verið er að taka ákvarðanir sem varða þau.
- Ungmennin voru ósátt og gerðu athugasemdir við að hafa ekki verið spurð áður en ákvarðanir voru teknar um breyttan einkunnakvarða.
- Kallað var eftir kynningum sem ná beint til nemenda á mikilvægum málefnum.
Í lok fundar afhentu fulltrúar Samfés Arnóri Guðmundssyni forstjóra Menntamálastofnunar ályktun af landsþingi ungs fólks sem haldið var á Akureyri 9. október sl., þar sem m.a. var ályktað um að ekki var haft samráð um styttingu framhaldsskólans og breyttan einkunnakvarða.
Menntamálastofnun hyggst í framtíðinni leita til ungmenna vegna ákvarðanatöku í málefnum sem varða þau og var fundurinn fyrsta skrefið í slíku samráði. Á næstu vikum verður unnið að því að flétta samráði við ungmenni inn í verklag stofnunarinnar og unnið með niðurstöður þessa fyrsta samráðsfundar. Skýrsla með niðurstöðum fundarins verður birt á heimasíðu mms.is og þær kynntar fyrir mennta- og menningarmálaráðuneyti.
