Þekktu réttindi þín er aðgengilegt og hnitmiðað námsefni um Barnasáttmála Sameinuðu þjóðanna sem samanstendur af vinnubók fyrir börn, handbók fyrir kennara, bæklingi um Barnasáttmálann og vönduðu veggspjaldi. Námsefnið bíður nemendum í lærdómsferðalag með það að markmiði gera sérhvert barn að sérfræðingum í réttindum sínum. Upphaflega er námsefnið hannað af UNICEF í Hollandi, í samstarfi við sérfræðinga í námsefnisgerð.
Við hönnun námsefnisins var m.a. unnið með börnum, kennurum og sérfræðingum frá UNICEF að því að meta hvers kyns fræðsluefni nýtist best í réttindafræðslu innan grunnskóla. UNICEF á Íslandi staðfærði efnið og gefur það út í samstarfi við Menntamálastofnun, með það fyrir augum að færa börnum og kennurum það að gjöf á afmælisdegi Barnasáttmálans, 20. nóvember næstkomandi. Útgáfan er styrkt af Barnaverndarsjóði - en börn sem þekkja réttindi sín eru líklegri til að leita sér hjálpar ef á þeim er brotið. Auk þess eru þau betur í stakk búin til að hafa áhrif á eigið líf og samfélagið í heild sinni.
Fjöldi rannsókna, meðal annars í Réttindaskólum UNICEF á Íslandi, hafa sýnt að þekking barna á réttindum sínum hér á landi er enn mjög takmörkuð. En slík þekking, meðal barna og fullorðinna, er einn af hornsteinum innleiðingar Barnasáttmála Sameinuðu þjóðanna. Samstarf milli UNICEF á Íslandi og mennta- og menningarmálaráðuneytisins við útgáfu efnisins gefur réttindafræðslu í grunnskólum aukið vægi, og er liður í markvissari réttindafræðslu. Útgáfan styrkir innleiðingu stjórnvalda á m.a. 4. og 42. grein Barnasáttmála Sameinuðu þjóðanna.